కంటి మా రాములను కనుగొంటి నేను
ప: కంటి మా రాములను కనుగొంటి నేను || కంటి || చ 1: కంటి నేడు భక్త గణముల బ్రోచు మా యింటి వేలుపు భద్రగిరినున్న వాని || కంటి || చ 2: చెలు వొప్పుచున్నట్టి సీతా సమేతుడై కొలువు తీరిన మా కోదండరాముని || కంటి || చ 3: తరణికుల తిలకుని ఘన నీలగాత్రుని కరుణారసము కురియు కందోయి గలవాని || కంటి || చ 4: హు రు మంచి ముత్యాలసరములు మెరయగా మురిపెంపు చిరునవ్వు మోముగలిగిన వాని || కంటి || చ 5: ఘలు ఘల్లుమను పైడిగజ్జెలందెలు మ్రోయగ తళుకు బెళుకు పాదతలము గలిగిన వాని || కంటి || చ 6: కరకు బంగరు చేల కాంతి జగములు గప్ప శర చాపములు కేల ధరియించు స్వామిని || కంటి || చ 7: ధరణిపై శ్రీరామదాసు నేలెడు వాని పరమ పురుషుండైన భద్రగిరిస్వామిని || కంటి ||